Á NOSA AMADA GALICIA

Quero cantar con todos vós de novo GALICIA, o fermoso poema de Manuel María musicado polo lembrado músico galego Suso Vaamonde, o grande Suso! Tantas veces a cantei cos meus queridos e sempre lembrados ex-alumnos! Tantas veces a cantei no meu queridísimo colexio O Piñeiriño! Que fermosas e nostálxicas lembranzas! Cantémola outra vez, ve-la aí vos vai! Por todas as veces que a desfrutamos xuntos. Cantádea de novo comigo. Desfrutemos da nosa querida Galicia! Aí a tedes:

 

 

TITO PORTO CO ALUMNADO DE 3º DE PRIMARIA

O pasado xoves, 9 de xuño de 2016, ás 12:50 h., o avó artista, o avó poeta, Tito Porto, o avó de honra do noso colexio, mantivo un encontro co alumnado de 3º de Educación Primaria, na sala de usos múltiples do colexio. Tito contou experiencias da súa vida, de cando el era neno, da escola do seu tempo... Logo recitou algúns dos seus poemas: Era o medo, Quixera ser un neno, A figuriña de barro (O tesouro),... E as nenas e os nenos interpretaron para el, O meu barco (acompañado con flautas doces por un grupiño de alumnos/as) e O caracol, ambos os dous poemas de Manuel María.

Tito aparte de agasallarnos coa súa presencia e co seu arte, unha vez máis, e agardamos moitas máis, tivo unha sorpresa para o alumnado: un balón do Real Madrid! (os poucos que eran do Barça protestaron, eso si moi cordial e pacificamente). 

Como sempre foi unha grata e agradable experiencia. E agradecemos a Tito a súa xentileza e as súas atencións cara o noso colexio, que sempre o recibe con ledicia e cos brazos abertos.

ATA OUTRA MILLORADA!

O RECITADOR, ENRIQUE BRUMBÉCK, NO PIÑEIRIÑO

Este pasado venres día, 3 de xuño de 2016,  ás 12:50 h.o recitador Enrique Brumbéck realizou un recital de poesía galega para o noso alumnado de 4º de Primaria e 5º de Primaria, grupo A, na sala de usos múltiples do noso colexio. O recital consistiu no recitado de poemas de Manuel María, Rosalía de Castro e Ramón Cabanillas. Ao final da intervención do Sr. Brumbéck, o alumnado respostou recitando e cantando poemas de Manuel María (Galicia, O caracol,...) e cantando a canción popular Ollos verdes...

Traballamos no alumnado:

- A escoita atenta

- A capacidade de memorización

- Capacidade de acollida de novas persoas e de novas actividades

- Abrirse a novas expectativas e a novas actividades

- Saber ser un público respectuoso, saber estar e actuar

- A expresión e a creatividade no noso idioma galego

- Despertar o aprecio pola beleza, pola poesía, pola nosa literatura e os nosos literatos

- Aceptar aos outros e convivir

- Aprecio pola nosa cultura, educarnos conxuntamente e saber gozar de obras e bens culturais, entre outas cousas.

Ao final do acto, o recitador fixo unha dedicatoria e unhas palabras para o alumnado e para o colexio.

XESÚS ALONSO MONTERO DE NOVO VISITA O CEIP O PIÑEIRIÑO DE VILAGARCÍA DE AROUSA

Mañán sobre as 11:00 chegará D. Xesús Alonso Montero, Presidente da Real Academia Galega, ao noso colexio. Na sala de usos múltiples pronunciará a conferencia:

Significado e Historia do Día das Letras Galegas

Para o alumnado de 5º e 6º de Educación Primaria.

O alumnado de 2º A, 3º A e 5º e 6º de Ed. Primaria agasallaranno coas seguintes cantigas de Manuel María con música de Suso Vaamonde e Roi Casal:

- Caracol, col
- O sol
- A estrela sen nome
- A roda-roda

- O meu burriño
- O meu barco

- Campás

- Galicia 

Para obter información sobre D. Xesús picade aquí:

 http://academia.gal/plenario?p_p_id=ManageChairs_WAR_ragportal&p_p_lifecycle=0&p_p_state=normal&p_p_mode=view&p_p_col_id=column-1&p_p_col_count=1&_ManageChairs_WAR_ragportal_action=showAcademic&_ManageChairs_WAR_ragportal_tableDate=1459802987308&id=15



https://gl.wikipedia.org/wiki/Xes%C3%BAs_Alonso_Montero


http://www.xerais.es/autores.php?tipo=autores&id=100005382

D. Xesús explicounos a orixe e as circunstancias da creación do Día das Letras Galegas, amosounos por medio dunha edición facsimilar do libro de Rosalía de Castro, Cantares Gallegos, a razón de por que se escolle a data, partindo da dedicatoria do libro que lle fai á escritora, que firmaba co pseudónimo de Fernán Caballero (Cecilia Böhl de Faber), que ten data do 17 de maio de 1863. De aí de que o primeiro Día das Letras da historia foi o 17 de maio de 1963, precisamente dedicado a Rosalía. E ofrécelle o poemario a Fernán Caballero por ser muller e por terlle dedicado escritos a Galicia e aos galegos de xeito agarimoso, agradable e bo, cando naqueles tempos eso non era costume. E a razón de que fose o 17 de maio, porque era cando Manuel Murguía, o seu marido e grande erudito galego, estaba de cumpreanos.

 Subliña don Xesús, que Galicia é o único país, que celebra o seu día grande e máis importante referíndose non a unha batalla, senón ás letras; á literatura. E fainos notar que a muller vai gañando terreno en ámbitos que antes lle estaban prohibidos, como o oficio de escribir, hoxe estamos de noraboa por vivir nunha democracia, nun réxime de liberdades, e o que é xusto con moitas e moi boas escritoras en lingua galega. E aínda que teñen que seguir a aumentar, contamos con catro mulleres académicas, cando antes non había ningunha; pero esto ten que mellorar xa que aínda hai 26 académicos na Real Academia Galega, prodúcese unha desproporción e hai que ir desfacendo esa desigualdade.

 Logo, fai un recorrido falando sobre algúns dos 53 escritores e escritoras homenaxeados nos Días das Letras Galegas, fixo referencias a Rosalía, Curros, Pondal, Cotarelo Valledor, Fermín Bouza Brey, Aquilino Iglesia Alvariño, María Mariño e detívose especialmente en Manuel María, a quen se lle dedica o Día das Letras Galegas no presente ano 2016.

Rematou o acto coa interpretación das cantigas de Manuel María por parte do alumnado do noso colexio, de entrega de agasallos e firma de autógrafos por parte de D. Xesús, con fermosas dedicatorias personalizadas ao alumnado que se achegou a el con dito fin, previamente respostou a algunhas preguntas que lle formularon os alumnos e alumnas. 

REPORTAXE FOTOGRÁFICA

REVISTA DE PRENSA, 06/04/2016
(Primeiro Diario de Arousa, logo La Voz de Galicia - Arousa)

A palabra é unha arma cargada de esperanza