NOVAS ACTIVIDADES

O MARTES 28 ÁS 10:20 H., NO SALÓN DE ACTOS, E ORGANIZADA POLO DEPARTAMENTO DE ORIENTACIÓN, REALIZARASE UNHA SESIÓN SOBRE TÉCNICAS DE ESTUDIO PARA O ALUMNADO DE 6º DE PRIMARIA, DITA SESIÓN SERÁ IMPARTIDA POLA EX-ALUMNA: PAULA SERÉN REIJA, LICENCIADA EN DEREITO E NA ACTUALIDADE CURSANDO UN MÁSTER DA ESPECIALIDADE.

Realizada a sesión, foi moi satisfactoria, o alumnado comportouse moi ben e a ponente estivo magnífica. Agardamos que os alumnos e alumnas de 6º de Primaria aproveiten e poñan en práctica o exposto.

 



O MARTES 18 DE FEBREIRO, ÁS 17:30 H., TEREMOS UNHA NOVA SESIÓN DA ESCOLA DE PAIS, BAIXO O EPÍGRAFE:

AXUDAR Á ESCOLA

E DA QUE MÁIS ADIANTE DAREMOS MÁIS DETALLES, AGORA É PARA QUE FAGADES UN OCO NAS AXENDAS.

PACIENCIA E BOS EXEMPLOS

Educar aos nosos nenos e nenas é unha tarefa apaixoante. Os nenos e nenas de hoxe serán os homes e as mulleres do mañá. Deles dependerá o futuro da Humanidade e o futuro do planeta e nós, como educadores, temos moito que ver con ese futuro. Agardemos que sexa un bo futuro. A infancia e a mocedade do hoxe son froito dos maiores do onte.
Aos nenos hai que amalos, valoralos, coñecelos, escoitalos; todo imprescindible para poder educalos.
Algo no que é preciso insistir, é que os nenos necesitan un tempo diario para xogar libremente cos seus iguais. Non lles roubemos o tempo de lecer e o tempo de xogo, son imprescindibles para medrar equilibradamente. O xogo é imprescindible e moi necesario para a educación harmónica e axeitada dos nenos, o xogo é algo natural e necesario nos nenos. Que xoguen cos seus iguais e coa mínima presencia dos adultos, hai excesiva presencia dos adultos na vida dos nenos, que precisan un tempo soltos para poder gozar dos iguais. Aí aprenderán a socializarse, a seguir as normas dos xogos, a autorregularizarse, o xogo libre cos iguais é enormemente educativo. Deixemos que se expandan que gocen da súa nenez. Un neno que xoga é un neno feliz.

BO NADAL E FELIZ ANINOVO 2014

O PROFESORADO DO CEIP O PIÑEIRIÑO DESÉXALLES UNHAS FELICES VACACIÓNS DE FINAL DO PRIMEIRO TRIMESTRE, UNHA OPORTUNIDADE PARA A CONVIVENCIA FAMILIAR E VECIÑAL. E QUEREMOS QUE O 2014 SEXA PROPICIO PARA TODOS, QUE ESTE DEMO DE CRISE OU O QUE SEXA QUE SE VAIA AXIÑA E QUE TODO O MUNDO POIDA TER UNHA VIDA DIGNA E CHEA DE OPORTUNIDADES. FELIZ 2014.

ACOMPAÑAR NO CRECEMENTO, A MEIOR PREVENCIÓN

 
Polo seu interese vou verquer ao galego un artigo aparecido no taco-calendario do Sagrado Corazón (11/12/2013):

AXUDAR A FACER

Un neno ve a unha bolboreta que se está a desprender con dificultade do seu casulo. Crendo axudala, libéraa delicadamente da súa envoltura. A bolboreta voa, recorre uns metros, mais axiña cae ao chan, morta.
 O pai explica que non se axuda á bolboreta facilitándolle a súa liberación. Ela debe conseguilo por si mesma, reforzando así os músculos das súas ás, que despois lle axudarían a voar.

Á luz deste exemplo, vós, os pais, deixades ao voso fillo ou filla afrontar por si mesmo as súas dificultades e retos, as súas responsabilidades e tarefas? Ou pretendedes facilitarlle as cousas facéndoas no seu lugar?

 A responsabilidade dos pais non é facer as tarefas do fillo, senón axudar a que el as poida facer. É necesario deixarlle cada vez maior responsabilidade para permitirlle desenvolver as competencias necesarias para a súa evolución e o seu crecemento. Parece claro que sempre é máis fácil ordear no seu lugar, lavarlle os dentes para estar seguros de que así quedan ben, atarlle os cordóns dos zapatos, pero, actuando así, el ou ela non aprende a facelo.

Sería un bo exercicio facer unha lista das tarefas que fas por el, substituíndoo a el e despois, sinalar cales podería facer perfectamente el por si mesmo, as que poderías delegar nel.
 
No fagamos do neno ou nena un ser inutilizado, dependente, consentido, mal criado; hai que educar para unha crecente autonomía. Aos nenos gústalles facer as cousas, sentirse útiles, permitamos o seu crecemento autónomo, brindémoslles ricas e variadas experiencias. 

E para previr toxicomanías, dependencias, etc. as claves son convivencia, diálogo, moito diálogo, dedicarlle tempo aos fillos, escoitalos, estar con eles, interesármonos polas súa cousas, dar bos exemplos e ter experiencias gratificantes, positivas e enriquecedoras en familia (gozar xuntos da convivencia familiar, contacto frecuente coa natureza -montaña, praia, animais, viaxes-, asistir a espectáculos e actividades culturais -festas, concertos, teatro, cine, conferencias, romarías, circo,...). Facer todo o posible para ser felices en parella, en familia, boas relacións entre todos, pais/fillos/familiares/veciños.

É moi importante, frecuentar o colexio, ter unha estreita, positiva, construtiva relación cos mestres e participar activamente en todas as actividades do colexio, ser e facer COMUNIDADE EDUCATIVA, os nosos nenos e nenas merécenno.   

ESCOLA DE PAIS E NAIS

 

DEPARTAMENTO DE ORIENTACIÓN

CONVOCATORIA DE ESCOLA DE PAIS E NAIS

                                   Benqueridas familias:

  Temos a ben, polo interese dos nosos nenos/as, convocar unha sesión da Escola de Pais e Nais, que terá lugar o

MARTES 26 DE NOVEMBRO DE 2013, ÁS 17:30 H. NO SALÓN DE ACTOS

e para tratar o seguinte tema:

Panel sobre prevención de toxicomanías e outras dependencias.

Dita Escola está especialmente dirixida aos pais/nais nun acto aberto a toda a Comunidade Educativa. Estará coordinada por Xermán Manoel Torres, orientador do noso centro e contará coa participación de Ánxeles Bravo, da área de prevención do SPAD de Vilagarcía e de Francisco Fernández, director de Cáritas de Arousa.

Dada a importancia do tema, pregamos a súa asistencia, un cordial saúdo,

Vº e Prace, o director,              O Xefe do Dpto. de Orientación,

Asdo.- Argimiro Serén Mera      Asdo.- Germán M. Torres de Aboal

Vilagarcía de Arousa, 22 de novembro de 2013

ACTIVIDADES DEPARTAMENTO DE ORIENTACIÓN

CONCRECIÓN ANUAL DE ACTIVIDADES DO PLAN XERAL DE ATENCIÓN Á DIVERSIDADE

CURSO 2013/2014

•  Durante todo o curso, o orientador recibirá e atenderá as demandas da comunidade educativa (do alumnado, das familias, do profesorado).

•       Organizaranse unha Escola de Pais e Nais cada trimestre

           - Panel sobre toxicomanías (outubro)

           - A nenez como oportunidade, como podemos coñecer mellor aos nosos nenos e nenas para

             axudalos a medrar (febreiro).

                - Transición da Primaria a ESO. O instituto. (Coordinada pola orientadora do IES “Fermín Bouza

                    Brey) –xuño-

•      Visita ao IES “Fermín Bouza Brey” (Alumnado de 6º) -2º tr.-

•       Obradoiro da Poesía (abril)

•       Obradoiro do Cómic

•      Técnicas de Estudo

•    Colaboración cos pais/nais nos contacontos e outras actividades que poidan xurdir.

•      Coordinación coa Admón. Educativa e colaboración coas universidades e cos servizos sanitarios e externos.

AXUDAS

ATA O 15 DESTE MES PÓDENSE SOLICITAR AS AXUDAS DO CONCELLO PARA MATERIAIS PARA A EDUCACIÓN INFANTIL.

O COLEXIO TRAMITOU TRECE SOLICITUDES DE AXUDA PARA O ALUMNADO CON NEAE (NECESIDADES EDUCATIVAS DE APOIO ESPECÍFICO) CUXO PRAZO REMATOU O PASADO 30/09/2013.

O VINDEIRO MARTES DÍA 15, CELEBRARANSE REUNIÓNS DO CLAUSTRO E DO CONSELLO ESCOLAR, ENTRE OUTROS IMPORTANTES ASUNTOS, TRATARASE SOBRE A PROGRAMACIÓN XERAL ANUAL.

MOI PRONTO O ALUMNADO DE 6º DE EDUCACIÓN PRIMARIA POÑERÁ A VENDA A LOTERÍA DE NADAL, QUE AXUDARÁ A FINANCIAR A SÚA EXCURSIÓN DE FIN DE PRIMARIA.

Todos os membros da nosa comunidade educativa (alumnado, familias, profesorado) somos axentes da vida do noso centro, participemos de xeito activo, constructivo e positivo en ben das nosas nenas e dos nosos nenos. Todos construímos o CEIP O PIÑEIRIÑO. O edificio actual do noso centro cumprirá 25 anos o vindeiro 1 de setembro, xa que o edificio empezou a utilizarse o 1 de setembro de 1989.